تصريحات الإعلامي الرياضي أحمد شوبير مع إمام عاشور في أمريكا
التقيت مع إمام عاشور بالأمس، وشرحلي تفاصيل إصابته، إمام قالي إنه مكنش حاسس بحاجة وعملوا العملية بشكل جديد، وإنه كويس وبياخد مسكنات قوية شوية، وزوجته انتقلت معاه للفندق .
إمام كلمني عن أحلامه في البطولة مش الاحتراف، وقالي إنه كان جاى بطموحات كبيرة جدًا وشرحلي بقا تفاصيل الإصابة، وقال أنا لما وقعت محستش بحاجة، بس لما وقع عليا اللاعيب حسيت بطرقعة كدا في كتفي .
لما جالي الانفراد وكنت بجري مكنتش حاسس بدراعي من الألم خالص، كان وجع رهيب جدا، كنت عايز أعمل الـ R2، بس مقدرتش خالص وجسمي مساعدنيش .
كان نفسي أكمل البطولة والمباراة دي، زعلان جدا عشان التعادل، وكنا قريبين جدا من الفوز، وفي كل الأحوال راضي بقضاء ربنا، وأقل من شهرين وأرجع الملعب، والمباراة اللي جاية هروح المدرجات أتفرج عليها، بس أنا أعصابي مش مستحملة، وبعد عشرة أيام من العملية هيبدأ التمرين الخاص بالعلاج الطبيعي .
